Drejtori i Agjencisë kundër Korrupsionit Yll Buleshkaj po merr pjesë Konferencën Rajonale në Kroaci me temën “Kultura e Integritetit: Masat përforcuese kundër korrupsionit”.
Organizuar nga Ministria e Drejtësisë dhe Administratës Publike të Kroacisë në bashkëpunim me Iniciativën Globale kundër Krimit të Organizuar, në Shibenik të Kroacisë, ka filluar punimet konferenca dy ditore, me temën “Kultura e Integritetit: Masat përforcuese kundër korrupsionit” që ka për qëllim forcimin e bashkëpunimit rajonal duke trajtuar luftimin e korrupsionit nëpërmjet, transparencës, përgjegjësinë dhe llogaridhënien e institucioneve publike në relacion me luftimin e korrupsionit.
Në adresimin e tij, në konferencë, Drejtori i Agjencisë kundër Korrupsionit, Yll Buleshkaj ka konfirmuar vullnetin e Republikës së Kosovës për domosdoshmërinë e bashkëpunimit rajonal në luftimin e korrupsionit, ndërsa, ka theksuar se sfida e vazhdueshme për të gjithë mbetet sigurimi i sektorit publik transparent, të përgjegjshëm dhe me integritet të lartë që i kontribuon zhvillimit ekonomik dhe fitores sonë në luftën kundër korrupsionit.
“Bashkëpunimi rajonal do na ndihmoj për shkëmbim te përvojave dhe informatave si dhe zhvillimin e kapaciteteve profesionale në përmbushjen e obligimeve tona për luftimin e korrupsionit’’ ka thënë Drejtori i AKK-së, Yll Buleshkaj
Në konferencë po marrin pjesë përfaqësues nga Ministria e Drejtësisë dhe Agjencive Kundër Korrupsionit nga Kosova, Kroacia, Sllovenia, Bosnja dhe Hercegvonia, Shqipëria, Mali i Zi, Maqedonia Veriore dhe Serbia.